Սիրտ-անոթային խնդիրներ ունեցող մարդկանց

«Սիրտ-անոթային խնդիրներ ունեցող մարդկանց, ընդհանրապես` նույնիսկ բոլոր երիտասարդներին խորհուրդ չի տրվում ամառվա շոգ եղանակին միանգամից գցվել սառը ջրի մեջ, քանի որ դա կարող է բացասական մեծ ազդեցություն ունենալ օրգանիզմի վրա, ընդհուպ` մինչև սրտի կանգը»,- այսօր ասուլիսի ժամանակ` խոսելով ամառվա հանգիստի ժամանակ առողջապահական տեսանկյունից թույլատրելի և ոչ թույլատրելի երևույթների մասին հայտնեց սրտաբան Լիանա Թումասյանը:

Ըստ բանախոսի` ամառվա շոգին նախընտրելի է լոգանքն ընդունել օրգանիզմը նախապատրաստելով, չշտապել:
«Պետք է այդպես անել, որ մարմինը պատրաստ լինի ջերմության կտրուկ փոփոխությանը, քանի որ դա բերում է մկանների կտրուկ ձգմանը, որը ազդում է նաև սրտանոթային համակարգի վրա»,- ասաց նա:

Ակտիվ հանգստի սիրահարներին բժիշկը խորհուրդ տվեց քիչ լինել արևի տակ, որպեսզի ջերմային հարված չլինի, բայց պարբերաբար արևի լոգանքներ ընդունել:

«Արևի տակ փոքր ժամանակ լինելը օգտակար է, քանի որ հագեցնում է օրգանիզմը D վիտամինով, դրական է ազդում նյութափոխանակության վրա»,- շեշտեց նա:

Ըստ բանախոսի` սրտանոթային խնդիրներ ունեցող մարդկանց խորհուրդ է տրվում ֆիզիկական վարժություններ կատարել չափի մեջ: «Ֆիզիկական վարժությունները նվազեցնում են քաղցեղի, դիաբետի, այլ մի քանի հիվանդությունների ռիսկերը, բայց շատ ակտիվ լինել պետք չէ»,- ասաց նա:

Լ.Թումասյանը նաև նշեց, որ առավոտյան վազքն ընդհանրապես հակացուցված է, քանի որ օրգանիզմը չի հասցնում զարթնել, իսկ այդ ժամերը նրա համար շատ լարված են:

Սրտաբանը խորհուրդ տվեց ամառվա օրերին զերծ մնալ նաև յուղալի սննդից: «Օրական պետք է սահմանափակել սնունդը մինչև 250-300 գրամ, հիմնականում` մրգեր, հում բանջարեղեն: Հակացուցված է խոզի և տավարի յուղոտ միս, հավի կաշին, բայց խորհուրդ է տրվում ձուկ, սև շոկոլադ»,- ասաց նա:

Չափի մեջ, ըստ բժշկի, կարելի է օգտագործել նաև ոգելից խմիչքներ, մանավանդ` կարմիր գինին: «Ամառվա եղանակին կարելի է օրական ըմպել մեկ շիշ կամ 350 գրամ գարեջուր, կամ 50 գրամ օղի», - հավելեց սրտաբանը:

Հարցեր, պատասխաններ, մեկնաբանություններ